Ovttaskas skuvlla váhnenráđi bargolávdegotti (VBL) ja riikkadási VVL gaskkas ii leat mihkkige lágas nannejuvvon váhnenorgánaid. Sullii 180 (oktiibuot sullii 430) riikka gielddas leat ásahan gielddadási váhnenlávdegotti eaktodáhtolaš vuođuin. GVL ulbmil lea bálddalastit gieldda skuvllaid dárbbuid/sávaldagaid, bargat skuvlejumiin ja fuolahit gulahallamis vásáhusaid birra. GVL:s berre leat viiddis ovddasteapmi, ja dat galgá leat politihkkáriid ja skuvlahálddahusa lunddolaš ovttasbargi.

Skuvlabiraslávdegotti ulbmil lea sihkkarastit, ahte skuvllas lea vuogádatlaš bargu buori skuvlabirrasa ovdii. SBL galgá leat skuvlla ráđđeaddi orgána dakkár áššiin, mat dasa gusket. Oahppit, váhnemat, skuvla, skuvlla bargit ja gieldda ovddasteaddjit galget leat ovddastuvvon lávdegottis. Váhnemiin ja ohppiin galgá ovttas leat SBL máŋggaidlohku.
Skuvlaeaiggáda ja rektora ovddasvástádus dat lea, ahte ráđđeorgánat ásahuvvojit ja doibmet oahpahuslága mearrádusaid mielde.

Buot váhnemat, geaid mánát leat skuvllas, leat skuvlla váhnenráđi lahtut. Váhnenráđđi vállje bargolávdegotti (VBL), mii ovddida váhnemiid oainnuid skuvlii. VBL galgá earret eará sihkkarastit ahte váhnemat besset duođas leat mielde váikkuheamen ja ahte sis lea duođalaš mielovddasvástádus das, ahte ohppiin lea buorre ja oadjebas oahppanbiras.

Oktavuođaváhnemat leat gulahallanreaidu joavkku/luohká váhnemiid ja Váhnenráđi bargolávdigotti (VBL) gaskkas, ja sii leat čanusin váhnemiid ja skuvlla gaskkas. Oktavuođaváhnemat soitet leat skuvlla mávssoleamos váhnenovddasteaddjit.